യാഹൂ, അള്ട്ടാവിസ്ത, ഹോട്ട്മെയില് എന്നിവ സൗജന്യ ഇമെയില് സേവനം കൊടുത്തു തുടങ്ങിയ ആദ്യവര്ഷങ്ങളില് മനുഷ്യര്ക്ക് പകരം കംപ്യൂട്ടര് തന്നെ വിവിധ പേരുകളില് ഫോം പൂരിപ്പിച്ച് ഇമെയില് വിലാസം കരസ്ഥമാക്കാന് തുടങ്ങി. ഇതിനു പിന്നില് പല ലക്ഷ്യങ്ങളുണ്ട്. ഒന്ന് പ്രസിദ്ധനായ ഒരു വ്യക്തിയുടെ പേരിലും സമാനപേരിലും ഉള്ള ഐ.ഡി എല്ലാം ഇപ്രകാരം മെഷീന് ഇ-മോഷണം നടത്തും. ഫലമോ ആ വ്യക്തി ദുര്ഗ്രാഹ്യമായ ഒരു മെയില് ഐ.ഡി യിലേക്ക് മാറാന് നിര്ബന്ധിതനാകും. അല്ലെങ്കില് പ്രസ്തുത വ്യക്തിയുടെ മെയില് ഒരു വന് തുക തന്നാല് തിരിച്ചു നല്കാം എന്നു പറയും. ഇത് വളരെയേറെ സാങ്കേതിക- സാമൂഹിക തടസങ്ങള് സൗജന്യ ഇമെയില് സേവന ദാതാക്കള്ക്കുണ്ടാക്കി. ഒരു മിനിട്ടില് ഇത്തരത്തില് 1000 ഇമെയില് രജിസ്ട്രേഷന് വരെ നടത്തിയ സംഭവം റിപ്പോര്ട്ട് ചെയ്തപ്പോള് സംഗതിയുടെ ഗൗരവം ഐ.ടി ലോകത്തിന് ബോധ്യപ്പെട്ടു. ഇതിനെ മറികടക്കാന് ഒരു മാര്ഗമേ ഉള്ളൂ. രജിസ്റ്റര് ചെയ്യുന്നത് മെഷീന് ആണോ മനുഷ്യനാണോ എന്ന് ബോദ്ധ്യപ്പെടുത്തുക. മെഷീന് വഴി ഇത്തരത്തില് യാന്ത്രിക രജിസ്ട്രേഷന് നടത്തുന്നതിനെ വെബ് റോബര്ട്ടുകള് അല്ലെങ്കില് ബോട്ട് എന്നാണ് അറയപ്പെടുന്നു.
ബോട്ടാണോ മനുഷ്യനോണോ എന്ന് തിരിച്ചറിയാനുള്ള സംവിധാനമാണ് കാപ്റ്റച(CAPTCHA-Completely Automated Turing Test To Tell Computers and Humans Apart) വെബ് രജിസ്ട്രേഷന് ഫോമിന്റെ അവസാന ഭാഗത്ത് വികലമാക്കപ്പെട്ട അല്ലെങ്കില് മനുഷ്യന് മാത്രം മനസിലാക്കാന് സാധിക്കുന്ന തരത്തില് ചിത്രീകരിച്ച ഒരു വാക്കോ അക്കങ്ങളോ ഉണ്ടാകും. രജിസ്റ്റര് ചെയ്യുന്നത് മനുഷ്യനാണെങ്കില് ഇത് നേരിട്ട് വായിച്ച് അതുപോലെ തന്നെ സമീപത്തുള്ള ബോക്സില് ടൈപ്പ് ചെയ്താല് രജിസ്റ്റര് നടപടി തുടരാം. അള്ട്ടാവിസ്ത, യാഹൂ എന്നീ സ്ഥാപനങ്ങളാണ് ഇത് ആദ്യമായി ഉപയോഗിക്കാന് തുടങ്ങിയത്, ഇന്ന് വിവിധ വെബ് അധിഷ്ഠിത ആവശ്യങ്ങള്ക്കായി യുക്തമായ രീതില് വേഡ് വെരിഫിക്കേഷന് തന്ത്രം ഉപയോഗിക്കുന്നുണ്ട്. മനുഷ്യനോണോ കംപ്യൂട്ടര് ആണോ നിയന്ത്രിക്കുന്നത് എന്ന് കണ്ടുപിടിക്കാനുള്ള ഗവേഷണങ്ങള് ഇന്ന് HIP (Human Interaction Proofs) എന്ന സവിശേഷ മേഖല തന്നെ സൃഷ്ടിച്ചുകഴിഞ്ഞു. Luis von Ahn ന്റെ നേതൃത്വത്തില് കാര്നെഗെ മെലന് (Carnegie Mellon) സര്വ്വകലാശാല യിലെ വിദഗ്ദരാണ് കാപ്റ്റ്ച വികസിപ്പിച്ചെടുത്തത്. ഇതേ സമയത്തുതന്നെ ജോര്ജിയ ഇന്സ്റ്റിറ്റിയൂട്ട് ഓഫ് ടെകനോളജി സമാനമായ ഒരു രീതി MHP (Mandatory Human Participation) എന്ന പേരില് രൂപപ്പെടുത്തിയെടുത്തിരുന്നു. ലോകത്ത് ദിനം പ്രതി 60 ദശലക്ഷം കാപ്റ്റ്ച വെരിഫിക്കേഷന് നടക്കുന്നുണ്ട്. ഓരോന്നും ശരാശരി പത്തുസെക്കന്റ ് കംപ്യൂട്ടര് സമയം എടുക്കുന്നുണ്ടെന്നാണ് കണക്കാക്കുന്നത്.
വേഡ് വെരിഫിക്കേഷന് നേട്ടങ്ങള്:
(1) ബ്ലോഗിലും വെബ് ഫോറങ്ങളിലും ഉള്ള 'കമന്റ് സ്പാം' നിരോധിക്കാനാകുന്നു. ഇല്ലെങ്കില് ഒരു കംപ്യൂട്ടര് പ്രോഗ്രാം ഉപയോഗിച്ച് പ്രത്യേക വാണിജ്യ ലക്ഷ്യങ്ങള് ഉള്ള പരസ്യമോ മറ്റോ കമന്റ് രൂപത്തില് നമ്മുടെ ബ്ലോഗില് എഴുതപ്പെടും. ഇത് കംപ്യൂട്ടര് മെമ്മറി അപഹരിക്കുമെന്ന് മാത്രമല്ല. കമന്റ് സ്പാമിന്റെ ബാഹുല്യത്തിനിടയില് നിന്ന് യഥാര്ത്ഥ കമന്റുകള് തിരിച്ചറിയാന് പോലും പ്രയാസമാകയും ചെയ്യും. നിങ്ങള് കമന്റെഴുതുമ്പോള് ഒരു വേഡ് വെരിഫിക്കേഷന് കൂടി പൂരിപ്പിക്കുക. ഇത് മാത്രം ചെയ്താല് കമന്റ ് സ്പാം ഒഴിവാക്കി മുന്നേറാം.
(2) നേരത്തെ സൂചിപ്പിച്ചതുപോലെ അനധികൃത ഇ- മെയില്/വെബ് ഫോം രജിസ്ട്രേഷന് തടയാം.
(3)ഇ-മെയില് വിലാസം സ്പാമര്മാരുടെ കൈവശം എത്തുന്നത് തടയാം. ഗ്രൂപ്പ് മെയിലുകളില് ഇ-മെയില് തുടങ്ങുന്ന അക്ഷരങ്ങള്ക്ക്് ശേഷം ഡോട്ട് അടയാളത്തുടര്ച്ച കാണാം. മനുഷ്യനാണ് ഉപയോഗ പ്പെടുത്തുന്നതെങ്കില് ഈ ഡോട്ട് ചങ്ങലയില് അമര്ത്തി വേഡ് വെരിഫിക്കേഷന് പൂരിപ്പിച്ചാല് ശരിയായ ഇ-മെയില് വിലാസം ദൃശ്യമാകും. ഇത് വഴി യന്ത്രവല്കൃത സ്പാമിനെ ചെറുക്കാം
(4) ഓണ് ലൈന് സര്വെ/പോള് എന്നിവ ഇന്ന് പുതുമയല്ലല്ലോ. വോട്ടില് HIP സംവിധാനം ഉണ്ടെങ്കില് കൂട്ടത്തോടെയുള്ള വോട്ടിടല്, 'ഇ-ബൂത്ത് പിടിത്തം' എന്നിവ ഒഴിവാക്കാം. അമേരിക്കയിലെ ഏറ്റവും മികച്ച കംപ്യൂട്ടര് സയന്സ് ബിരുദ പഠനപദ്ധതി നല്കുന്ന സ്ഥാപനത്തെ കണ്ടുപിടിക്കാന് ഒരു ഓണ് ലൈന് വോട്ടെടുപ്പ് നടപ്പാക്കുകയുണ്ടായി. വോട്ടെടുപ്പ് സുഗമമായി മുന്നേറുന്നതിനിടെ കാര്നെഗെ മെലന് സര്വ്വകലാശാലയിലെ വിദ്യാര്ത്ഥികള് കംപ്യൂട്ടര് പ്രോഗ്രാം ഉണ്ടാക്കി നൂറുകണക്കിന് വോട്ട് ഒരുമിച്ച് ചെയ്തു. ഇതറഞ്ഞ എം.ഐ.ടി യിലെ വിദ്യാര്ത്ഥി സമൂഹം മറ്റൊരു കംപ്യൂട്ടര് പ്രോഗ്രാം ഉണ്ടാക്കി തിരിച്ചടിച്ചു. വെബ് റോബര്ട്ടുകളുടെ രൂക്ഷമായ വോട്ടിംഗിനവസാനം ഫലം പ്രഖ്യപിച്ചപ്പോള് 21,156 വോട്ടോടെ എം.ഐ.ടി ഒന്നാമതെത്തി, തൊട്ടടുത്ത് കാര്നെഗെയും മൂന്നാം സ്ഥാനം മുതലുള്ളവര്ക്ക് കേവലം ആയിരം വോട്ടില് താഴെ മാത്രം. എങ്ങനെയുണ്ട് വേഡ് വെരിഫിക്കേഷന് ഇല്ലാത്ത അവസ്ഥ!
(5) നിങ്ങളുടെ ഇ മെയിലിന്റെ പാസ് വേഡ് കണ്ടുപിടിക്കാനായി വെബ് റോബര്ട്ടുകള് നിഘണ്ടുവിലുള്ള വാക്കുകള് എല്ലാം ഉപയോഗിച്ച് ശ്രമം നടത്തും. ഇതിനെ തടയാനായി സേവനദാതാക്കള് 5 അല്ലെങ്കില് 6 ശ്രമം കഴിയുമ്പോള് ഇമെയില് തത്കാലത്തേക്ക് നിര്ജീവ മാക്കുമായിരുന്നു. പക്ഷെ ഉപഭോക്താക്കള്ക്ക് ഇത് വലിയ അസൗകര്യം സൃഷ്ടിക്കും. ഇതൊഴിവാക്കാന് മൂന്നാമത്തെ ശ്രമം മുതല് ഒരു വേഡ് വെരിഫിക്കേഷല് കൂടി പൂരിപ്പിക്കാന് നിര്ദ്ദേശിച്ചാല് മതിയാകും.
കാഴ്ച കേള്വി വൈകല്യം ഉള്ളവര്ക്ക് പോലും ഉപയോഗിക്കാന് പറ്റുന്ന രീതിയില് ശബ്ദ-ദൃശ്യാനുവര്ത്തി കാപ്റ്റ്ച വികസിപ്പിച്ചു കഴിഞ്ഞു. ഇതു കൂടാതെ കംപ്യൂട്ടര് പ്രോഗ്രാമിന്റെ സഹായത്തോടെ ചോദ്യം ചോദിച്ച് ഉത്തരം ലഭ്യമാകുന്ന (1+3=?) രീതിയും കോമണ് സെന്സ് ചോദ്യങ്ങളും (സൂര്യന് ഉദിക്കുന്നത് ഏത് ദിക്കില്??,ആകാശത്തിന്റെ നിറമെന്ത്?) വെരിഫിക്കേഷന് വേണ്ടി അപൂര്വ്വമായി ഉപയാഗിക്കാറുണ്ട.്
പുസ്തക പരിചയം
ഡോ.എ.പി.ജെ അബ്ദുള്കലാം തന്റെ വെബ്സൈറ്റിന്റെ(www.abdulkalam.com)ഭാഗമായി തുടങ്ങിയ ഇ-പത്രത്തിന്റെ പേരെന്ത്?
ബില്യണ്ബീറ്റ്സ് (Billion Beats)
ഇന്ഫോ ബൈറ്റ്സ്
ആരാണ് നെറ്റിസണ്?
ഇന്റര്നെറ്റിലും ഓണ്ലൈന് ഗ്രൂപ്പുകളിലും സജീവമായി ഇടപെടുകയും കൂടുതല് സമയം ചിലവഴിക്കുകയും ചെയ്യുന്ന പൗരന്.InterNET , citIZEN എന്നീ വാക്കുകള് ചേര്ന്നുണ്ടായ പുതിയ വാക്ക്
Quotable Quote:
"Think big, Think fast, Think ahead. Ideas are no one's monopoly"
Dhirubhai Ambani